大頭蝦人士必睇！日本超貼心失物處理　寄到屋企唔再怕漏低咗搵唔番

唔少人去旅行都一定試過喺酒店Check out或搭完車之後，先發現自己漏咗嘢，唔知點攞番....喺日本就有一個超貼心嘅失物處理服務，可以幫你將失物寄返你屋企。

嚟緊2020年就係東京奧運，日本為咗配合不同旅客嘅需要，除咗加強唔同行業嘅培訓之外，就連失物處理方法都超級貼心，令各位「大頭蝦」遊客就算真係唔小心漏咗嘢都唔使咁擔心。

Photo from shutterstock

相信酒店一定係最經常出現失物嘅地方！有資料顯示，就2019年現時為止，旅客遺留喺酒店嘅失物已比去年多出三成以上，當中包括衣服、手信、錢包、鎖匙等，甚至有人漏低整個行李箱。

Photo from Pinterest

但因為酒店有規定指搵到嘅失物必須要保管一段時間不能直接丟棄，所以對於要處理愈嚟愈多嘅失物而感到煩惱。

有見及此，有酒店就同物流公司合作，提供寄送服務，將旅客遺留喺酒店嘅失物幫佢哋寄番返海外嘅屋企。

Photo from OSS TUMOCA

失主只要向酒店查詢唔見咗嘅嘢，如果佢哋有喺酒店中搵到，咁酒店就會聯絡物流公司提供服務。

當然依個服務唔係免費嘅，失主需要自行承擔郵費，費用會按你嘅物品而收錢。

Photo from shutterstock

咁以後就唔怕唔見咗啲有紀念價值嘅嘢喇！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）